O MAIO!

"AÍ VEN O MAIO

DE FLORES CUBERTO..."

Na nosa terra, a FESTA DOS MAIOS, tamén coñecida simplemete como os Maios, adóitase celebrar o 1 de maio. Ten orixe nas civilizacións prerromanas, como a celta. 

Vicente Risco definiu perfectamente a esencia desta festa na nosa terra: " a festa dos maios é a festa da primavera, ben sexa da súa chegada, ben do seu trunfo. Significa o reverdecer das plantas, o comezo do ano agrícola, a ledicia de ver erguerse o sol por riba do horizonte e coller altura e forza".

A festa consiste en realizar diversas representacións ó redor dunha árbore ou escultura chamada maio. A xente canta coplas mentres camiña ó redor del acompañados da percusión duns paus. 

O maio constrúese sobre un armazón de paus con forma cónica ou piramidal, recuberta de tea metálica ou arpillera, que se cubre de mofo, fiúncho ou herba. (Normalmente o armazón constrúese sobre unha plataforma que permite transportar o maio polas rúas). 

O maio decórase con flores, follas, fiúncho, fieitas, froitos, ovos... O cumio pode coroarse de diversas maneiras.

No cole quixemos "vivir" esta festa e facer o noso propio MAIO. Para iso todos os pequech@s de educación infantil recopilaron plantas silvestres e flores de diversos tipos.

Onte, luns, comezaron a facer o maio os peques de 5 anos. E mentres nós aproveitamos para empaparnos da tradición:

* Aprendemos cousiñas sobre esta festa.

* Observamos e nomeamos algunhas das plantas e flores que trouxeron.

* Buscamos imaxes na rede, visionamos algún video e escoitamos cantigas sobre os maios.

* Falamos sobre os colares que adornan os maios: de laranxas, de ovos, de flores...

- Mateo trouxo ovos baleiros e explicounos como os preparou co seu pai. Despois con moito tino fixemos un colar con eles para vestir o noso maio.

- Fixemos colares con pampillos e rabos de cartuchos. Primeiro preparamos e cortamos as flores, logo con axuda de agulla e fío fixemos os colares. 

Despois de todo o que practicamos onte, hoxe, martes, tocounos a nós, os alumn@s de 4 anos, saír ao patio cuberto para "adornar" o noso maio.

Fixemos 4 equipos, xa que no patio había 4 zonas ben diferenciadas con diferentes talleres, polos que fomos rotando.

* Sacar pétalos e clasificalos.

* Facer "alfombras floridas" cos pétalos. 

* Realización de colares para o maio.

* Elaboración de "auga de maio": con herbas aromáticas.

Pasámolo en grande!

Para rematar, fixemos un corro ó redor do maio e xiramos cantando unha copla que aprendemos expresamente para isto: